सिरहा । बालविवाह अन्त्यका लागि राज्य र समाज गम्भीर नरहेको एक कार्यक्रममा सरोकारवालाहरूले गुनासो गरेका छन् । सिरहाको मिर्चैयामा बिहीबार आयोजित बालविवाह न्यूनीकरण सम्बन्धि कार्यक्रममा सरोकारवालाले यस्तो गुनासो गरेका हुन् ।
मधेशी आयोगको आयोजना तथा प्लान इन्टरनेशनल र सामाजिक विकास एवं अनुसन्धान केन्द्रको सहकार्यमा आयोजित बालविवाह अन्त्यका लागि धर्मगुरुहरूको भूमिका सम्बन्धि अन्तरक्रिया तथा प्रतिबद्धता कार्यक्रममा सहभागीहरूले राज्य र समाजको लापरबाहीले बालविवाह घट्न नसकेको गुनासो गरे ।
‘बालविवाह कानुनको उल्लंघन मात्र होइन, यसले अनेकानेक समस्या पनि निम्त्याउँछ,’ सहभागी एक महिलाले गुनासो गरिन्, ‘तर, यो अन्त्यका लागि न राज्य गम्भीर भयो, न समाज ।’ स्थानीय सरकारले यसका लागि काम गरे हदसम्म न्यूनीकरण हुने भएपनि यसप्रति कुनै चाँसो नलिएको उनको गुनासो छ ।
मुस्लिम समुदायका अर्का एक सहभागीले राज्य र समाजका जिम्मेवार व्यक्तिहरू नै यसको प्रोत्साहनमा लागेको गुनासो गरे । ‘बालविवाह भएको देख्दा रोक्नका लागि कतिपय ठाउँमा प्रयास पनि हुन्छन्,’ उनले भने, ‘तर, जिम्मेवार मान्छेहरू नै बिहे गराउनेतिर लाग्छन् ।’
धनगढीमाई नगरपालिकाकी उपप्रमुख संगिता कुमारी चौधरीले समाजका सबै तहतप्काका व्यक्तिहरू प्रतिबद्ध नभएसम्म बालविवाह नरोकिने बताइन् । ‘हामीले बालविवाह रोक्न प्रयास गरेका छौं, तर धम्कीहरू आउँछन्,’ उनले भनिन्, ‘यसका लागि सबै प्रतिबद्ध बन्नुपर्छ ।’
मधेशी आयोगका अध्यक्ष विजय दत्तले धर्मगुरुहरू समाजका अगुवा भएको भन्दै उनीहरूलाई निम्त्याएर यो कार्यक्रम गरेको बताए । कार्यक्रममा सहभागी मधेश प्रदेशकी प्रदेश प्रमुख सुमित्रा सुवेदी भण्डारीले समाजमा हुने सबै विवाहहरूमाथि सोधखोज र निगरानी गर्न आग्रह गरिन् ।
